ក្នុងទឹកមុខភិតភ័យ និង ស្លេកស្លាំងទំនងជាបាក់ ស្បាតដោយសារតែ មានរឿងរ៉ាវដ៏ជូរចត់ និង តក់ស្លុត កន្លងមក នាងតូចច្រឡឹងដែលមាន អាយុទើបតែ ១៣ ឆ្នាំនោះ ហាក់បីដូច ជាស្ទាក់ស្ទើរ និង ភិតភ័យមិនចង់ និយាយរឿងរ៉ាវ ដែលបានកើតឡើង នៅពេលកន្លងមកជាមួយមនុស្សប្លែក មុខឡើយ ។ នៅពេលជួបអ្នកយក ព័ត៌មានយើងដែល ជាអ្នកប្លែកមុខ នោះ នាងមិនហ៊ាននិយាយមកកាន់ យើងឡើយ ប៉ុន្តែដោយសារបងស្រី នាងប្រាប់ថា “អត់អីទេអូន ចូរអូនប្រាប់ រឿងរ៉ាវដ៏គួរឱ្យឈឺចាប់របស់អូនទៅ” ទើបនាងនិយាយទាំងទឹកភ្នែក និង អួលដើម-កថាៈ “ខ្ញុំត្រូវបងថ្លៃរំលោភ នៅឯស្រុកថ្មពួកហើយរឿងរ៉ាវទាំងនេះ ត្រូវបានបងស្រីប្តឹងប៉ូលិសហើយ ។

      នៅថ្ងៃទី ៩ ខែឧសភា ឆ្នាំ ២០១២ នគរបាល ស្រុកថ្មពួក បានចាប់បុរសម្នាក់ឈ្មោះ អ.ស. នៅក្នុង ឃុំគោករមាស ស្រុកថ្មពួក ខេត្តបន្ទាយមានជ័យ តាមពាក្យបណ្តឹងរបស់ប្អូនថ្លៃដែលជាកុមារីរងគ្រោះ ប្តឹងពីបទចាប់រំលោភនាងកាលពីថ្ងៃទី ១៧ ខែមេសា ឆ្នាំ ២០១២ នៅគ្រាដែលប្រពន្ធជនសង្ស័យ និង ត្រូវ ជាបងស្រីរបស់ខ្លួនទៅមើលគេរាំធុងបាស់ ។ បុរស សង្ស័យដែលសមត្ថកិច្ចចាប់ខ្លួនឈ្មោះ អ.ស. អាយុ ២០ ឆ្នាំ បុរសសង្ស័យចាប់រំលោភប្អូនថ្លៃស្រីនេះ មានប្រពន្ធឈ្មោះ ធ.រ. អាយុ ២១ ឆ្នាំ ទើបសម្រាលកូន ។

      កុមារីរងគ្រោះឈ្មោះ ធ.ត. អាយុ ១៣ ឆ្នាំ ត្រូវជាប្អូនស្រីបង្កើតរបស់ឈ្មោះ ធ.រ. រស់នៅ ជាមួយជនសង្ស័យ ជាបងថ្លៃដែរ ។

      លោកវរសេនីយ៍ត្រី អ៊ុន សំអន មន្ត្រីនគរបាល ខេត្តបានឱ្យដឹងថា ក្រោយពេលកើតហេតុ ក្មេងស្រី រងគ្រោះត្រូវ បានបងស្រីបញ្ជូនទៅឱ្យរស់នៅជាមួយ បងស្រីម្នាក់ទៀតនៅឯក្រុងប៉ោយប៉ែត ក្នុងគោល បំណងកុំឱ្យប្តីរបស់ ខ្លួនធ្វើសកម្មភាពបែបថោកទាប បន្តទៀត ប៉ុន្តែនៅថ្ងៃទី ២៥ ខែមេសា ឆ្នាំ ២០១២ បងស្រីរបស់កុមារី ធ.ត. អាយុ ២៤ ឆ្នាំ នៅសង្កាត់ ប៉ោយប៉ែត ក្រុងប៉ោយប៉ែត បាននាំប្អូនស្រីមកដាក់ ពាក្យបណ្តឹងនៅស្នងការដ្ឋាននគរបាលខេត្តដើម្បីឱ្យ ជួយរកយុត្តិធម៌ បន្ទាប់ពីគាត់ជជីកសួរប្អូនស្រីដឹង អំពីហេតុការណ៍ដែលប្អូនប្រុសសាច់ថ្លៃចាប់រំលោភប្អូនស្រីរបស់គាត់មកនោះ ។

      តាមការឱ្យដឹងរបស់កុមារីរងគ្រោះបានរំឭក ថា នៅវេលាម៉ោង ៩ យប់ ថ្ងៃទី ១៧ ខែមេសា ឆ្នាំ ២០១២ នាងកំពុងដេកនៅក្នុងផ្ទះម្នាក់ឯង នៅ ពេលដែលបងស្រីរបស់ខ្លួន និង ត្រូវជាប្រពន្ធ អ.ស. ទៅមើលគេរាំធុងបាស់ បងថ្លៃប្រុសក៏បានចាប់ រំលោភនាងរហូតទាល់តែសម្រេច ។

      ក្នុងបណ្តឹងក្មេងស្រីរងគ្រោះបានឱ្យដឹងដែរ ថា បន្ទាប់មកនៅពេលបងស្រីរបស់ខ្លួនមកពីមើល គេរាំធុងបាស់វិញ ឃើញនាងកំពុងអង្គុយយំទើបសួរ ដេញដោល ហើយនាងក៏ទម្លាយរឿងនេះប្រាប់បង ស្រីពីហេតុការណ៍ ដែលបានកើតឡើងចំពោះនាង ។ ក្រោយពីបងស្រីដឹងទង្វើរបស់ប្តី បងស្រីក៏បានបញ្ជូន ប្អូនស្រីឱ្យទៅរស់នៅ ជាមួយបងស្រីម្នាក់ទៀតនៅក្រុង ប៉ោយប៉ែតកាលពីថ្ងៃទី ១៨ ខែមេសា ឆ្នាំ ២០១២ ក្នុងគោលបំណងកុំឱ្យមាន អំពើបែបនេះកើតឡើង លើប្អូនស្រីរបស់ខ្លួនទៀត ។ ពេលទៅដល់ប៉ោយ ប៉ែត បងស្រីឈ្មោះ ធ.ត. សង្កេតឃើញប្អូនស្រីមាន ទឹកមុខស្រពាប់ស្រពោន ទើបសួរដេញដោលក៏ធ្លាយ រឿងបងថ្លៃប្រុសនាងចាប់រំលោភ ។

      ក្រោយពេលបានទទួលពាក្យបណ្តឹងពីបងស្រី ក្មេងស្រីរងគ្រោះ កម្លាំងជំនាញចុះទៅសហការ ជាមួយកម្លាំង នគរបាលប៉ុស្តិ៍ឃុំគោករមាស ប៉ុន្តែ ដោយសារជនសង្ស័យទំនងជាដឹងខ្លួនក៏បានគេចខ្លួន បាត់មួយរយៈ ទើបតែថ្ងៃទី ៩ ខែឧសភា ឆ្នាំ ២០១២ ពេលដែលជនសង្ស័យព្យាយាមចូលមកក្នុងផ្ទះវិញ ក៏ត្រូវនគរបាលប៉ុស្តិ៍ឃុំគោករមាសចាប់បញ្ជូនមក ស្នងការដ្ឋានតែម្តង ។

      នៅចំពោះមុខសមត្ថកិច្ច អ.ស. បានប្រាប់ សមត្ថកិច្ចថា គេបានត្រឡប់មកពីមើលទូរទស្សន៍នៅ ផ្ទះអ្នកជិតខាង ហើយបានឃើញប្អូនថ្លៃស្រីកំពុង ដេកតែម្នាក់ឯង ប៉ុន្តែមិនបានចាប់រំលោភនោះទេ គឺគ្រាន់តែទៅទ្រោបពីលើ នាងតែប៉ុណ្ណោះ ។

      បើទោះជាជនសង្ស័យ អ.ស. នៅមិនទាន់ សារភាពក៏ដោយ តែយោងតាមពាក្យបណ្តឹងក្មេង ស្រី ជនសង្ស័យ ត្រូវបានកម្លាំងនគរបាលខេត្តបន្ទាយ មានជ័យបញ្ជូនសំណុំរឿងនេះទៅតុលាការ ដើម្បី ស្រាវជ្រាវចាត់ការបន្ត ៕